Nein, dies fragt sich nicht der Volkstanzkreis Reinach, sondern 2 Mitglieder dieses Kreises, die am 25. April beide 66 Jahre alt geworden sind. Und spontan laden sie den ganzen Tanzkreis und weitere Tanzbegeisterte mit nachstehender "Ylaadig" zu einem Fest ein.
Ylaadig
Mit 66 Jahren fang’ erst das Leben an?
Jetzt wollen wir doch wissen: ist wirklich etwas dran?
E flotte Start isch sicher guet,
drum isch’s uns jetzt ums FESCHTE zmuet.
Jä – wo und wie und wenn soll’s sy?
Und zerscht: wär lade mr denn y?
Ains isch vo Afang klar fir `s Ganze:
mir möchte DANZE, DANZE, DANZE!
Mir hoffe fescht, ass Euch das gfalli
und ass Ihr kömmet, alli, alli!
Vo Rynach und vo ooben abe,
alti Heere, jungi Schabe,
die wo hingge, die wo gumpe,
die Langen und die glaine Stumpe,
die Gfitzte und die Glaitige,
die mit de lange Laitige,
die Fridligen und alli Nätte,
die, wo mr lieber stiller hätte,
d’ „Ussländer“ und die Trächtige,
die graue Müüs, die Prächtige,
die Haitere, die suure Stai,
die mit de Gnüppel in de Bai,
die wo juble, die wo mure,
die glainen und die groosse Schnure –
die sollen alli, alli ko,
Hauptsach, d’ Freud am DANZ isch do!
Mir laden y zum ZÄMME FYRE.
Mir hän das jo nit kenne styre,
ass uns dr Storgg im Ooberoot
und baidi glatt zwai Wuche z’spoot
abgäh het imene Spittel
mit Hilf vomene wysse Kittel.
KÖMMET und bringet öbbis mit,
ass es e Mumpfel z’Ässe git.
`s Dringge stelle mir barat,
`s muess niemerts Durscht ha, `s wär jo schad.
Dräffpunggt isch `s ANDREASHUUS –
dy Tschipiess kunnt sicher druuss.
Wär dringend ebbis wetti schängge,
dä kennti an Bolivie dängge.
Me ka, me muess sich nit verstegge,
e Batzen in e Schachtle stegge.
Jetzt nimm e Kuli, bsinn dy nit,
und schryb: `s isch klar, au ych mach mit!
Mit 66 Jahren, da fängt das Leben an!
Wir wissen`s: da ist sehr viel dran!
Mir freuen uns uff unser Fescht
mit öppe 66 Gescht!
Es lade-n-y: dr Pascal und dr Werner
Und es hett gfäggt wie nochstehendi Bilder zeige.
