Wider hett d'Trachtegruppe Sissech erfolgrich sini Oschtereier in dr Begegnigszone in Sissech verchauft.

Hür macht sich dr Oschterhas scho im März uf e Wäg,
hett echt d’Trachtegruppe ihri Oschtereier scho zwäg?
Jo, bim Eier verziere und färbe si alli gärn derbi,
Gräsli si gsammlet worde numme si si no es bitzeli chli.

Do wärde Eier mit dene Gräsli und Strümpf ibunde,
Schnell vergönge bim wärche und plaudere die Stunde.
Bim Färbe fehlt natürli dr Zibeleschale-Sud nit,
wüll’s doch so nostalgisch schöni Oschtereier git.

Zum Schluss wärde si mit Späckschwarte schön poliert,
und am Grüendonnschtig hei se Trachtelüt stolz präsentiert.
Au das Johr hett die treui Chundschaft d‘Trachtegruppe nit vergässe,
do g’ghört me wider säge „Oh die Eier si jo z’schöön zum ässe“!

Es ich e Freud wie das Gschäft  lauft,
bald isch s’letschte Oschterei verchauft.
D‘ Trachtelüt vo Sissech si sich einig, e isch e so,
e grosse Dank söll an die viile gute Chunde go.

MaHa

Fotos: Hanspeter Misteli, Marianne Hauswirth