Tatsachebricht

Corona blogt is jetzt scho sit me ne Johr
s’ isch zum Hooröl seiche, s’ isch doch wohr!
Tanzverbot wie im tiefe Mittelalter
drum blybt dehei s’ Moni mit em Walter

Unmöglich isch s’ Mitenander im Verein
ich find das bodebös gemein
Alli Aläss wärde abgseit oder au verschoobe
vom Morge früeh bis z’ Obe spot: Fyyroobe

Muesch nid studiere was am Weekend willsch mache
als Zytvertriib chasch Zopf und Chueche bache
Viil Zyt verbringsch im eigne Garte
dr Vereinsusflug, dä muess warte

D Agända isch zum Gähne läär
Termine z’ finde wär nid schwär
Trotzdäm isch’s nid eifach z’ plane
wie der Wind wääit, so au d’ Regle-Fahne

Mini Fründe triff i bim go Laufe
d’ Läde sind zue, chasch nüt meh chaufe
S’ Kaffi git’s us der Thermoschanne
statt Hallebad heisst’s Badewanne

Zum Tanze müen mir e Maske a legge
s’ goth nid lang bis das alli tüend tschegge
Mimik gsehsch e keini meh
Erklärige muesch für alles geh

Öb i di a lach oder dir d’ Zunge use streck
s blybt es Rätsel oder doch e Schreck?
Flissig tüen mir wäsche öisi Händ
Desinfektionsmittel yriibe die wo wänd

Öb Fasnacht, Eierläset oder Maitanz mir vermisse öisi Traditione
Drum probiere mir doch eifach us so nöi-i Kombinatione.
Dr Basler Galopp in Tracht mit Zwärge-Larve
s’ Piccolo spielt derzue, nid e Ängel uf der Harve

Vom Kulturelle BL d’ Esther Roth
Die kennt beschtens öisi Not
Bechunsch motivierendi Wort zum Wytermache
d’ Coronavire wo mutiere sin alli nid ganz bache

Corona hi, Corona här
s’ fallt is allne schampar schwär
Jetzt löhn mir öis doch alli rasch lo Impfe
denn hört das ändlich mit däm Schimpfe!

Narri, narro, jetzt bin i wieder froh!

e Värs vo de Zipfelmütze, Februar 2021