Hütt am 3. Juli hämmer mit der Trachtegruppe Muttenz wie jedes Johr by der Buurehuusmuseums-Stuubete zmittst im schöne Muttenzer Dorfkärn mitgmacht. Grad do isch am Pfingschtsamschtig und au vor einere Wuche no alles überschwemmt gsi. Me het aber fascht nüt meh gseh dervo.

Mir hän mit 8 Paar folgendi Dänz danzt:
Schründler, Caroline, Schilthorn, Galopp Ursin, Mairösliwalzer, Trachtegruppe Muttenz, Krawall im Stall.

D’Fottene het der Hermann gmacht (Danke villmoll!) und sie zeige folgendi Ydrück vo däm schöne Nomidag:

1. Vor em Ydanze: D‘ Rueh vorem Schturm.
2. Jetzt goht’s denn grad los. Mir sind parat,  d’DJane Eva au! (Danke für d’Hilf!) 
3. Do simmer am Galoppiere bym Schründler. 
4. Es glingt nit alles so guet, aber der Vorteil vo Fähler isch, dass denn alli lache (mien).
5. Die zwei Dame hän Freud bym Danze. 
6. D´Muttenzer  Jodler könne vill Lieder sehr guet, aber am beschte gfallt mir jedes Johr s’glyche Schtück: Nämlig der Schteimandlijutz
7. Der Fahneschwinger ussem Aargau bynere schwierige Figur, woner über d’ Fahneschtange schtyge muess (är isch also nit am Schtolpere).
8. Do schtoht der Fahneschwinger schtandfescht uf beide Bei.
9. Es isch absolut erschtunlig, dass d’Auto eifach durefahre während mir danze…
10. Galopp Ursin klappt!
11. S‘Panorama mit Trachtegruppe, Publikum,  Hund , Rollschtuehl und Kirche St. Arbogast im Hintergrund.

Karin Geitz für d’Trachtegruppe Muttenz