Es grüenet duss in Fäld und Wald,

jo d'Oschtere chunnt scho bald.

Do het d Trachtegruppe kei Rueh,

si sueche Chrüttli dere hets gnue.

In dr Chuchi choche wider e paar Manne,

verschideni, farbigi Sud in grosse Pfanne

S isch alles im grüene Bereich bim dekoriere,

am Änd si d Eier no mit Schwarte z poliere. 

Farbeprächtigi Ostereier het das geh,  

drunder chamme sogar Grüeni  gseh

Denn no zume Eiersalat e chli zäämesitze,

doch eine cha eifach nit ufhöre Eier z ritze.

Schnäll isch denn dr Grüendonnschtig cho,

für e Eierverchauf wird d Tracht füre gno

Alles isch useputzt und die Ständ si grichtet,

denn wärde scho die erschte Chunde gsichtet.

Für die chline Kunstwärk git's viil Koplimänt,

die si fascht z schad zum ässe am Änd.

Aber ufs Eiertütsche muess niemer verzichte,

„s Aug isst mit“ nach dem tuet me sich  richte.

MaHa

Fotos: Marianne Hauswirth